Eskuhartze estrategiak heziketa fisikoan: kasu bakar baten azterketa

Abstract

Lan honen helburua orain dela 34 urte Magisteritza ikasi eta hainbat Hezkuntza Fisikoko ikastaro burutu izan zituen Derrigorrezko Bigarren Hezkuntzako irakasle baten hezkuntza estrategien azterketa egitea izan da. Horretarako 1go mailako gela batean aurrera eramandako irakaslearen plangintza islatzen duten 22 saio aztertu dira, jardueren barne logikaren ezaugarri adierazleak kontuan hartuz. Ezaugarri hauek aztertuz, hamar ariketatatik bederatzitan arerioaren presentzia azaldu da. Horrekin, %60 batean kolaborazio-oposiziozko jarduerak gailendu dira eta honen barnean duelu kolektiboa izan da errepikatuena, hau da gaur egun kirol mediatikoenen antolakuntza. Kirolean azaltzen den lehia alde batera utziz, %70 batean memoria gabeko jarduerak azaldu dira, hezkuntza garaian aurkitzen garen seinale. Hezkuntzaren ezaugarria ere bada ia jarduera guztiak eremu ziur eta seguru batean ematea. Irakasleak une oro ikasleak kontrolpean izan ditu, ingurumenetik inolako ziurgabetasuna suposatzen duten jarduerak aurkeztu gabe. Azterketa honekin, argi ikusi da irakaslea nondik datorren, zein gizarte bizi izan duen, zein hezkuntza jaso eta zein ikasketa mota burutu duen. Irakasle bakoitzak bere esperientzian bizi izandako eta ikasitakoa jartzen du ondoren abian heziketa fisikoko programa bat burutzerakoan, nire irakaslearen kasuan, kiroleko estruktura jarraitzen duten joko-jolasak izan dira hezkuntza estrategien ardatz.