Multimedia-Internet

Abstract

Paradoxikoa dirudi multimedia-Interneten aroan multimedia-Interneti buruzko liburu bat argitaratzea. Hala ere, oraindik, idatzizkoa da biderik onena eta erabiliena ezagutza hedatzeko, bai unibertsitate-mailako ikasketetan, behintzat. Arlo akademiko horretan kokatzen da liburu hau, haren hasierako helburua baita euskarazko Informatika Ingeniaritzako eta antzeko ikasketen sostengua izatea. Baina ez da helburu bakarra, horretarako dagoeneko bai baitaude beste liburu batzuk gure liburutegietan. Liburu hau euskaraz dago idatzita. Horretan datza haren bigarren helburua, egindako lanari zentzua benetan ematen diona: euskara idatzia zabaldu orain arte inoiz urratu ez dituen bideetan. Oso gutxi daukagu idatzita, euskaraz, Internet- eta multimedia-teknologien inguruan. Hutsune hori betetzera dator liburu hau, teknologia horien inguruan lan egiten duten, dibertitzen diren, eta ikasten edo irakasten duten euskaldunei bidea samurragoa egitera. Liburu honi esker euskaldunoi errazagoa egiten bazaigu multimedia-Interneterako teknologiaz hitz egitea eta idaztea, helburua beteta dago.