Idazketa aberasteko Edmodo plataforma digitala

Abstract

Egungo ikasleek duten idazteko gaitasun mailari erreparatuz eta trebetasun honen didaktikaz hausnartuz, teknologiak irakaskuntzan izan dezakeen erabilera positiboa baloratzea da abiapuntua. Horregatik, lan honek hizkuntza ekoizpenaren, zehazki idazmenaren, eta komunikazio teknologien erabileraren arteko uztartzea zein neurritan eman daitekeen aztertzea du helburu. Horretarako, 2018-2019 ikasturtean Bigarren Hezkuntzako ikasleekin narrazio testuen idazketa lantzeko egin da esku-hartzea, ikasgela birtualak aurrez aurreko klaseen osagarri bihurtuta, ikasleek idazmenarekiko motibazioa eta jarrera aldatze aldera. Egindako esku-hartzearen balorazioa, aurten Edmodo LMSa idazketarako baliatu duten irakasleei egindako inkesta bidez egin da. Aipatzekoak dira inkesta horretan jasotako balorazio positiboak, ikasgela birtualen erabilerak ikasleen jarreran, idazmenean zein lan koperatiboan izan ditzakeen aukerak eta onurak azpimarratuz. Jasotako emaitzak oinarri izanik, hurrengo ikasturterako (2019-2020) sekuentzia didaktikoaren proposamena egin da. Idazmena, prozesu isolatu bat bezala ulertzetik harago, komunikazio eta kolaborazio ekintza bezala ulertzeko, IKTek prozesu horretan izan ditzaketen aukerak aztertuko dira.