Europako uraren zuzentarauaren helburuak, egokitasuna eta ezarpena: Europatik Euskal Herrira

Abstract

Europan ezarrita zeuden uraren inguruko araudi guztiak bateratzeko asmoz sortu zen 2000. urtean Uraren Europako Zuzentaraua (European Water Framework Directive, WFD). Bere helburu nagusia 2015. urterako Europako estatukideek beraien mugen barnean kokaturiko ur-masa guztien (gainazaleko zein lurpeko uren) egoera ekologiko ona ziurtatzea da. Helburua erdiesteko kide bakoitzak bere ur-masen ikerketarako eta hobekuntzarako plan bereziak garatu behar ditu. Egoeraren larritasunaren arabera, hainbat mailatako monitorizazio-programak diseinatzea eskatzen da, hots, zaintzarako, ekintzarako edo ikerketarako monitorizazioak. Datu esanguratsuak eta konparagarriak lortzeko beharrezkotzat jotzen da, bestalde, inguru eta konpartimendu bakoitzerako erreferentzia-balio egokiak (Environmental Quality Standards-ak, EQS-ak) definitzea. Espero zitekeenez, Zuzentarauaren ezarpena ez da prozesu erraza gertatzen ari. Orain arte Europa mailan egindako lanetan oinarrituz, ur-masen portzentaje esanguratsua sailkatu da ur-masa oso eraldatu moduan. Euskal Herrian esaterako, ur-masen %7.8ak besterik ez du eskuratzen egoera ekologiko ona. Are gehiago, garrantzi ekologiko eta ekonomiko handia duten trantsizio-uren artean ez da egoera ekologiko ona eskuratzen duen ur-masarik identifikatu. Hau guztia kontuan hartuta, onartuta dago ezinezkoa gertatuko dela Zuzentarauak 2015. urterako finkaturiko xedea lortzea Europako herrialde gehienetan, Euskal Herria barne. Beraz, Zuzentarauren ezarpenerako bidean oraindik egiteke dagoen lana gogorra da.