Erizainek bideratutako kasu kudeaketak komunitateko kide helduen osasun emaitzetan duten eraginaren azterketa

Abstract

Marko teoriko eta justifikazioa: Gaur egun, gure gizartean geroz eta ohikoagoa bilakatzen ari da gaixotasun kronikoak, eta hala nola, pluripatologia pairatzea, bizi esperantza luzatzeak eta biztanleriaren zahartzearen ondorioz. Kondizio hauek biztanleriaren osasunean ondorio garrantzitsuak eragiten dituzte, baita osasun sistemetan ere. Arazo honen aurrean gobernuek estrategiak aldatu eta kronizitateari aurre egiteko beste estrategia batzuk garatu behar izan dituzte, hauetariko bat, kasu kudeaketa erizainaren rola. Helburu orokorra: Komunitateko erizain bideratutako kasu kudeaketak komunitatean bizi diren heldu pluripatologikoen osasun emaitzetan duen eragina aztertzea. Metodologia: Literaturaren errebisio kritikoa burutu zen. 2000. Urtetik gaur egun arte gazteleraz zein ingelesez publikaturiko artikuluak hartu ziren kontuan. Bilaketak hainbat datu base desberdinetan egin dira: Medline, Pubmed, Cinahl, Cuiden, Embase, Cochrane, Elsevier, ScienceDirect. Beste baliabide elektroniko batzuk ere erabili dira: RNAO, NICE, Wiley Library. Eskuzko bilaketa egiteko springer link, Primary Health care Research & Development, International Journal of integrated Care eta American Journal Of Managed Care erabili ziren. Eztabaida eta emaitzak: Kasu kudeaketa praktika heterogeneoa da herrialde edo erkidego desberdinen artean. Osasun sistemaren erabilerari dagokionez ospitalizazioetan jasotako emaitzak onuragarriak izan ziren kasu kudeaketaren alde, hamaika artikulutik zortzik jaso zituzten ospitalizazio tasen murrizketak. Larrialdi zerbitzuen erabileran eta lehen mailako arretaren erabileran aldiz ez zen emaitza argirik aurkitu. Ez eta mortalitateari dagokionez, 2 artikuluk biziraupen tasak igotzen dituela adierazi zuen aldiz beste hiru artikuluk ez zuten aldaketarik nabaritu. Azkenik parametro klinikoei dagokionez, nahiz eta parametro desberdinak neurtu ziren, aurkitutako hiru artikuluek onurak adierazten zituzten. Mugapenak eta ondorioak: Kasu kudeaketak ospitalizazio murrizpen eta parametro kliniko hobekuntzen aldeko ebidentzia aurkitu da. Baina gai hau zehatzago ikertu ahal izateko, arlo honen inguruko ikerketa esperimental gehiago egin beharko lirateke, longitudinalak eta multizentrikoak. Datozen denborei eta biztanleriaren garapenari erantzun bat eman ahal izateko beharrezkoa ikusten da figura honen definizio zehatza osatzea (konpetentziak, hezkuntza eta praktika gunea) eta eraginkortasuna aztertzea.