Futbol partidu aurreko beroketan ematen den kanpo kargaren analisia: klub bereko talde zein postu ezberdinen artean konparaketa.
Abstract
Hainbat ikerketetan ikusi da futbol partidu aurreko beroketak errendimendua eta lesioen prebentzioan izugarrizko garrantzi duela. Hala ere, gaur egun ia ez dago beroketako kanpo karga aztertzen duen ikerketarik. Honegatik, lan honen helburua futbol partidu baten aurretik egiten den beroketako kanpo karga ezaugarriak ezagutzea eta konparatzea izango da, bai adin maila ezberdineko taldeen artean baita postu espezifiko ezberdinen artean ere. Konparaketa hau egiteko GPSak beroketan zehar ematen dituen datu absolutuak eta partidu osoarekin konparatuta beroketan ematen dituen datu erlatiboak erabiliko dira. Metodoa: Futbol klub bereko 96 jokalarik parte hartu dute, guztira 2019-2020 denboraldiko 719 GPS fitxa indibidual analizatuz. Jokalari hauek 4 taldetan banatzen dira: lehen talde profesionala (PRO), bigarren taldea (U23), hirugarren taldea (U21) eta jubenilen taldea (U18). Talde bakoitzeko jokalariak 6 postutan banatu dira: defentsa zentrala (DZ), alboko defentsa (AD), erdilaria (ERD), barnealdekoa (BAR), alboko aurrelaria (AA) eta erdiko aurrelaria (EA). Emaitzak: ikusi da ezberdintasun esanguratsua dagoela aldagai askotan, bai taldeen artean baita talde barneko postu espezifikoen artean ere. Eztabaida: Ikerketa honen aurkikuntza nagusienetako bat PRO taldeak beste taldeek baino kanpo kargaren maila baxuagoak pairatzen dituela izan da. Bestalde, beroketako kanpo kargaren ehunekoak nahiko aldakorrak dira aztertzen den aldagaiaren arabera, abiadura ezberdinetan burututako distantziaren kasuan (>18 y >21 km/h) ≈%5 ingurukoa izanik eta Aload aldagaian, berriz, ≈%20 ingurukoa. Horrez gain, taldeen arteko analisia egitean datu absolutu eta erlatiboen artean ez da ia ezberdintasunik ikusten, bai ordea postuen artean. Amaitzeko, partidu batean zehar erdilariek defentsa zentralek baino distantzia total gehiago burutzen dutela ondorioztatu da. Ondorio nagusi gisa esan daiteke partidu aurreko beroketaren inguruko ikerketa gehiago behar direla jarduerak egoki planteatzeko eta jokalariak partidura egoera hoberenean iristeko.