Urrutiko lana eta deskonexio digitalerako eskubideari aipamen xumea

Abstract

Azken urte honek kontzeptu berri asko utzi dizkigu (koronabirusa, urrunera soziala…), eta horietatik, lan arloan urrutiko lanaren kontzeptua izan da izarra, nahiz eta guztiz berria ez izan. Izan ere, testuinguruari begira, bi izan daitezke loraldi honen arrazoiak. Lehenik, Covid-19aren ondoriozko konfinamendua eta hori dela eta produkzioaren jarraipenaren beharra legoke. Hain zuzen ere, urrutiko lanari esker enpresa askok eta administrazio publikoak lan-jarduera mantentzea lortu izan dute, lehenengo kasuan ABEE1ak bezalako beste neurriekin nahastuz. Bigarrenik, teknologia berrien garapenaren bitartez (Iraultza 4.0) lanaren digitalizazio gero eta azkarragoa bizi du egungo gizarteak. Horrela, sakon aztertu den gig economyaz haratago, urrutiko lanak ere bitarteko digitalak eta lan-jardueraren egikaritzea uztartzen ditu.