BackHizkuntza-arteko distilazioa eta antzekotasun semantikoa maiz egiten diren galderak erantzuteko
Abstract
Azken urteotan gure artean egon den COVID-19aren harira, gaixotasunari buruzko dudak argitzeko sistema bat garatu nahi izan da, Osakidetzak eskainitako Maiz Eginiko Galderen (MEG) multzo batean oinarrituta; honela, sistemaren helburua, erabiltzaileak galdera bat eginik, MEGean haren semantikoki antzekoena dena bilatzea da, sistemak iragarritako galderaren erantzunak duda argitzeko balioko duela suposatuz.
Hori horrela, ideia nagusia euskarazko zein gaztelaniazko sistema bana garatzea izan da, eta hizkuntza hauen baliabideak ingelesekoekin alderatuz nahikoa mugatuak direnez, distilazio bidezko ikasketa erabili da ahalik eta eredu eraginkorrenak sortzeko, ingelesez birdoitutako ereduetatik ikasiz.
Hala, distilazioak ekartzen dituen onurak aztertu nahi izan dira, distilatu gabeko ereduekin alderatuz domeinuko zein domeinuz kanpoko ebaluazioaren bitartez. Emaitzei erreparatuta, helburu nagusia bete dela ikus daiteke, aipatutako bi ebaluazio motetan distilazioaren bidez hobekuntza nabarmenak lortu baitira distilatu gabeko ereduekin alderatuz, kasu batzuetan emaitza benetan lehiakorrak lortuaz.