Zaintza ekosistemak. Lurralde plangintza ikuspuntu feministatik. Deba eta Itziarko hirigintza analisiak.

Abstract

Azken hamarkadan, ehundaka manifestazio, mahainguru eta tailer abiatu dira “Zaintzak erdigunera” lelopean. Erdigune politikora, batetik, hedabideen eztabaidetara eta gobernuen lehentasunetara. Eta erdigune fisikora, bestetik, etxeko pribatutasunetik herriko kale eta plazetara. Azken puntu honetan berebiziko garrantzia hartzen du Lurralde Plangintzak. Zaintzak espazio publikoan egin daitezen, gure komunitateetako hirigintza birplanteatu behar dugu. Hirigintza feministaz baliatuz, gure lurraldeko mugikortasuna, segurtasuna, etxebizitza, jarduera ekonomikoa, ekipamenduak… eraldatzeko eman beharreko pausoak irudikatuko ditugu; eta eraldaketarako bidean, gure komunitateetan aurrera pausoak eman ditzakegula erakusteko, Deba eta Itziar herrietan Mapa Moreak sortu ditugu parte-hartze prozesu baten bitartez.