Melatonina suplementazioak loan duen eragina insomnioa pairatzen duten helduetan: berrikuspen bibliografikoa

Abstract

Sarrera: Insomnioa loaren nahasmendu ohikoena da, munduan helduen %10-30ari eragiten diona. Loa osasuna eta ongizatea mantentzeko beharrezkoa den prozesu fisiologikoa izanik, beharrezkoa da loaren nahaste hau eraginkortasunez tratatzea. Egun, benzodiazepinak erabiltzen dira nagusiki nahaste hau tratatzeko; oro har, hipnotiko hauen kontsumoa Espainian munduko altuena da. Farmako horien albo ondorioak eta insomnioaren intzidentzia gorakorra dela eta, beste tratamendu alternatibak baloratzeko eta aztertzeko beharra dago. Horren aurrean, melatonina exogenoa interes handiko tratamendu aukera izan daiteke.

Helburu: Berrikuspen bibliografiko honen helburu nagusia insomnioa pairatzen duten helduetan melatonina suplementazioak loan duen eragina aztertzea da.

Metodologia: Bilaketa-sistematikoa 2023ko abendutik 2024ko otsailera egin da, eta ikerketa galderari erantzuna emateko PIO egitura jarraitu da. Bertatik identifikatu diren DeCS eta MeSH deskriptoreak eragile bolearrekin konbinatuz lortu den bilaketa-estrategia PubMed, BVS, Dialnet eta Cochrane datu-baseetan erabili da. Ondoren, bilaketa-sistematikoan lortutako emaitzei iragazkiak zein ezarritako barneratze- eta baztertze-irizpidek aplikatu eta berrikuspen bibliografiko honi erantzuna ematen dioten emaitzak lortu dira.

Emaitzak: Berrikuspen bibliografiko honek 13 artikulu biltzen ditu eta horietan melatoninaren eragina ondorengo parametroetan aztertzen da: loaren latentzia denbora, loaren eraginkortasuna, loaren iraupen totala eta lo hartu ondorengo esnatzeak.

Eztabaida: Lehenik eta behin, loaren latentzia denboraren kasuan, melatoninak 2-30 minutu bitarteko aldea erakutsi zuen plazeboarekin alderatuta, batez ere askatze luzeko melatonina erabiltzen zen kasuetan. Hurrengo parametroarekin jarraituz, melatoninak insomnio pairatzen duten helduen loaren iraupen totala 8-50 minutu bitartez luzatu dezakeela dio ebidentziak. Amaitzeko, loaren beste parametro objektiboei dagokionez, hau da, loaren eraginkortasuna eta lo hartu ondorengo esnatzeak; melatoninak ez zuen eragin esanguratsurik izan. Orokorrean ez zen kontrako ondorio larririk jakinarazi melatoninaren inguruan.

Ondorioak: Melatonina suplementazioa eraginkorra da insomnio pairatzen duten helduen latentzia denbora eta loaren iraupena hobetzeko. Aldiz, ez du eraginkortasunik loaren eraginkortasunean eta lo hartu ondorengo esnatzeetan. Hala eta guztiz ere, ikerketa gehiago beharrezkoa da gai honen inguruan.