Zooplanktonaren erantzuna eragile hidroklimatiko eta antropogenikoei euskal kostaldeko bi estuarioetan

Abstract

[EUS] 1998-2005 urteen denboraldiko Bilboko eta Urdaibaiko estuarioen zooplanktonaren konparaketa egin zen, kutsadura mailak eta estuario bakoitzaren ezaugarri hidromorfologikoek zooplanktonaren dentsitate eta egituran nola eragiten duten zehazteko. Estuario bakoitzaren eskualde euhalinoko 30, 33 eta 35 gazitasun eremuetan zooplankton talde ohikoenen alderaketak egin ziren estuarioen artean. Estuarioen arteko eta estuarioan zeharreko zooplankton taldeen dentsitate eta inguruneko aldagaien desberdintasunak estatistikoki frogatu ziren bitartean, urtez urteko zooplankton komunitatearen bilakaera eskalamendu multidimentsional ez-metrikoa (nMDS) eta Spearman korrelazioa eginez deskribatu zen. Zooplankton taldeen dentsitateek bilakaera desberdina izan zuten gazitasunarekin batera bi estuarioetan, Bilboko estuarioan kutsaduraren eragina jasaten zutela aditzera emanez. Itsasoratze eremuko zooplankton totalaren dentsitate balioak altuagoak izan ziren estuario honetan. Bilboko estuarioaren barnealderantz zooplankton taldeen dentsitatearen murrizpena gertatu zen, batez ere bertako oxigeno asetasun balio baxuak zirela eta. Ikerturiko azken urteetan Bilboko barne estuarioaren kopepodo dentsitatearen eta bi estuarioen arteko zooplankton komunitate egituraren korrelazioaren emendioa gertatu zen inguruneko aldagaien hobekuntzaren ondorioz. 1997-1999 eta 1999-2001 urteetako ikerketen emaitzekin alderatuz estuarioen arteko desberdintasunak murriztu dira Ondorioz, emaitza hauek Bilboko estuarioaren berreskuratzearen baitan gertatzen ari den zooplankton komunitatearen eboluzioa adierazi zuten, uraren kalitatearen emendioarekin loturik dagoena.