Egoitzetan loturei agur esaten. Egoitzetan euste mekanikoen erabilera murrizteko heziketa interbentzioen eraginkortasuna aztertzea

Abstract

Esparru Kontzeptuala eta Justifikazioa: Lotura mekanikoen erabilera eztabaidagarria den gaia da, batez ere, esparru soziosanitarioan. Bere erabilera justifikatzeko hainbat argudio erabiltzen diren arren, eragin negatibo ugariak sortzen dituzte fisikoki, psikologikoki, sozialki eta legeriaren aldetik. Eragin negatibo ugariak direla jakinda, oraindik bere erabileraren prebalentzia zifra altuak daude. Horregatik, azkenengo urteetan, artikulu askok lotura mekanikoen erabilera murriztea askotan gomendatu dute. Honen ondorioz, hauen erabilera profesionalen artean murrizteko xedearekin, interbentzio ezberdinak sortu dira, ohikoenak, hezkuntza interbentzioak.

Helburua: Egoitzetan euste mekanikoen erabilera murrizteko heziketa interbentzioen eraginkortasuna aztertzea.

Metodologia: Literaturaren errebisio kritikoa egin da, datu baseetan (Medline, Cuiden, PsycINFO, Lilacs, Embase, CINAHL), praktika klinikoko gidetan (Cochrane, RNAO, Osteba) eta eskuzko bilaketa eginez, aldizkari espezializatuetan (Geriatric Nursing, Revista Española de Geriatría y Gerontología eta Age and Ageing) eta editorialetan (Scielo, Dialnet, Clinical Key eta Science Direct-en). 2008 eta 2018 urteen artean argitaratutako artikuluak aztertu dira, bai ingelesez baita gaztelaniaz ere.

Emaitzak eta Eztabaida: Lotura mekanikoak murrizteko dauden hezkuntza interbentzio mota ezberdinak aztertu dira. Hezkuntza motaren irizpideari jarraituz, osagai anitzeko interbentzioek erakutsi dute eraginkortasun mailarik altuena. Interbentzioa jaso duten profesionalen irizpidea kontuan hartuz, egoitzetako profesional guztiei bideratutako interbentzioa/heziketa programek emaitza hobeak lortzen dituzte euste mekanikoen erabilera murrizteko orduan. Halere, aztertutako ikerketa gehienek hobekuntza metodologikorako tartea erakutsi dute. Bestalde, interbentzioak nori zuzenduta dauden ere aztertu dira.

Ondorioak: Aztertutako artikuluen arabera, ez dago ebidentzia nahikorik egoitzetan lotura mekanikoen erabilera murrizteko hezkuntza interbentzioak eraginkorrak direla esateko.