Konpetentzia digitalen markoaren gaineko unitate didaktiko digital berrerabilgarria

Abstract

Azken hamarkadetako hezkuntza paradigmak konpetentzien eskuratzean oinarritutako ikaskuntza prozesua balioesten du. Era berean, eremu ezberdinetatik (Europar Batzordea, UNESCO, Heziberri 2020...) oinarrizko konpetentziea horien artean konpetentzia digitala ere jasotzen da. Konpetentzia digitala nabarmendu dezakegu bere transbertsalitateagatik eta beste konpetentzien garapenean egiten duen ekarpenagatik, besteren artean, gaur egungo gizarteetan parte hartzeak teknologia digitalarekin loturiko hainbat konpetentzien beharra eskatzen baitu. Hala bada, konpetentzia digitalean ikasleak trebatu behar baldin badira, beharrezkoa izango da irakasleak ere arlo horretan jantzita egotea. Norabide horretan, lan honen xedea izan da EAEko Berritzegune Nagusiaren prestakuntza ekimen globaleko konpetentzia digital markorako proposatutako materialetik abiatuz ikas unitate digital bat zehaztea, eta Moodle plataforman jasotzea autoikaskuntzan oinarritutako ikastaro berrerabilgarri gisa. Hala, txosten honetan bildu dira batetik konpetentzia digitalaren gaineko lanketa teorikoa, eta bereziki DIGCOMP erreferentzia-markoaren nondik norakoak eta irakasleen trebakuntzari begirako alor batzuk, hala nola norberaren profil digitala garatzeko lagungarri izan daitezkeen baliabide batzuk. Bestetik, Moodle plataforman konpetentzien bidezko ebaluazioa nola egin azaldu da, aukera hori ere baliatuz DIGCOMP ereduan oinarritutako Moodle Plataformarako konpetentzia-markoa edo framework bat proposatzeko. Azkenik, Moodle Plataformarako konpetentzia digitalen gaineko ikastaroa diseinatu (helburu, metodologia, ebaluazio eta bestelakoak zehaztuz) eta gauzatu da (HEZikt graduondokoak erabiltzen duen plataforman bertan jasoz; hemen eskuragarri: https://ikasgela-birtuala.ueu.eus/course/view.php?id=510).