Etxezarretako hariztia berreskuratzeko bideen, landare inbaditzaileen kontrolerako mekanismoen eta landaketa aukeren azterketa eta jardueren proposamenak

Abstract

Arrasateko udalak 2019. urtean erosi zuen 83 hektareako lursail bat, Etxezarreta parkea izenekoa. Azalera horretatik 63 hektarea gutxi gora behera pinudia izandakoa zen, eta beste 20 hektarea bertako zuhaitz eta zuhaixkak. Pinudiaren mozketa txanda bete ondoren pinuak moztu ziren, eta orain, Arrasateko Udalak kudeaketa plan bat idatzi nahi du etorkizunean bertako baso osasuntsu bat lortzeko asmoarekin. Gaur egun pinua mozteko teknikak oso bortitzak izaten dira eta sortutako kalteak baldintzatzen dute bertako basoaren hedapena. Hori horrela, Arrasateko Udalak sinatu zuen hitzarmen bat Euskal Herriko Farmazia Fakultatearekin Ingurumen Zientzietako ikasle batekin egiteko parkeko egoeraren hasierako azterketa bat. Azterketan aurkitu ziren arazoak hurrengoak izan ziren: parkeko bide-sarearen egoera, landare inbaditzaileak kontrolpean izateko mekanismoen beharra eta landaketa puntualak egiteko beharra. Arazoak aztertzearekin batera proposatu ziren gomendio batzuk sortutako ingurumen kalteak konpontzeko eta parkeko biodibertsitatea handitzeko. Bideen egoerari dagokionez, bide guztiak plano batean jaso ziren ArcGIS programa erabilita. Baita ere egin zen fitxa bat bide bakoitzaren ezaugarriekin eta mantendu edo naturalizatzeko proposamenekin. Ondoren, udalak erabiliko ditu emaitza hauek azken erabakia hartzeko. Proiektu honetan ere aztertu ziren landare inbaditzaileen kontrolerako neurriak. Bibliografian oinarrituta, ondorioztatu zen kontrol kimikoa dela eraginkorrena eta emaitza hori zen proposatu zitzaiona Udalari landare inbaditzaileak kontrolatzeko. Azkenik bertako basoa nola errekuperatu aztertu zen eta ondorioztatu zen naturari uztea bere lana egiten. Hala ere, etorkizunean arazoak sumatzen badira Miyawaki metodoaren ezarpena gomendatu zen. Txosten honetan jaso ziren emaitzak aplikagarriak dira Gipuzkoa eta Bizkaiko edozein pinu mozketatan, izan ere, antzeko orografia eta prezipitazio maila daukate. Gainera, mendian lan egiten duten enpresak egurra ateratzeko metodo antzekoak dauzkate eta antzeko arazoak errepikatu daitezke.