Xurgapen transdermikoa hobetzeko estrategia berriak: nanogarraiatzaileak

Abstract

Laburpena: Azken hamarkadan larruazal-bideko administrazioak inoiz ez bezalako ospea irabazi du. Horren atzean dauden arrazoi nagusienak larruazaleko gaixotasun kronikoen intzidentzia handitu izana eta gidatutako farmakoentzako administrazio-teknika berriak sortzeko beharra izan dira. Hori dela eta, garrantzizkoa da xurgapen transdermikoa hobetzen duten estrategiak aurkitzea; eta ikerketek diotenez nanogarraiatzaileak aukera oparoena dira. Sistema lipidiko hauek farmakoen disolbagarritasuna areagotzeari, larruazaleko lipidoak fluidizatzeari eta haien egitura deformatzeari esker jarduten dute. Horrela, erabili beharreko dosi totala murriztea eta administrazio sistemikoaren ondoriozko eragin desiragaitzak saihestea lortu daiteke. Dena dela, nahiz eta nanogarraiatzaileak seguruak eta eraginkorrak direla frogatu, oraindik ere egonkortasun arazoak, industria-mailako ekoizpen erronkak eta gehiegizko kostua gainditu beharreko oztopoak dira. Beraz, ezinbestekoa da nanogarraiatzaileak ikertzen jarraitzea, etorkizunean administrazio transdermikoaren funtsa izan daitezkeelako.