Linfoma eta leuzemia minbizia duten pazienteen bizi-kalitatean eta nekean erizaintza zainketak barne hartzen dituen jarduera fisikoak duen eragina

Abstract

Sarrera: Espainian, minbizien intzidentziaren hirugarren postuan, minbizi hematologikoak aurkitzen dira eta hauen artean prebalentzia altuena linfoma eta leuzemia minbizi motak dute. Minbizia dutenen artean aurkitzen den sintomarik ohikoena minbiziarekin lotutako nekea da eta nabarmena da honek, pazienteen bizi-kalitatean eragin handia duela. Honen harira, jarduera fisikoa, minbiziarekin lotuta dagoen neke hori murrizteko tresna lagungarria izan daitekeela aipatu beharra dago.

Helburua: Lan honen helburu nagusia linfoma eta leuzemia minbizia duten pazienteen bizi-kalitatean eta nekean erizaintza zainketak barne hartzen dituen jarduera fisikoak duen eragina aztertzea da.

Metodologia: Ikerketa galderari erantzuteko errebisio narratibo bat erabili da eta PIO egituraren bitartez artikuluen bilaketa jorratu da. Bilaketa bibliografiko hau egiteko datu-base ezberdinak erabili dira, hala nola, PubMed, Biblioteca Virtual de la Salud, Dialnet, Cuiden eta Cochrane. Bilaketa mugatzeko iragazkien erabilera egin da eta barneratze eta baztertze irizpideak aplikatu dira. Azkenik, web-orrien bitartez lana osatzeko informazioa lortu da.

Emaitzak: Erizaintza zainketak barne hartzen dituen jarduera fisikoko programen artean erabilienak aerobikoa eta indar ariketak direla agerikoa da, hauek jorratzerakoan eta zenbait eskalen bitartez ebaluatu ondoren, aztertu da nekearen murrizketa eta bizi-kalitatearen hobekuntza nabaria dela. Linfoma eta leuzemia parekatzerakoan, bi minbizietan nabaria da jarduera fisikoko programen onura, nahiz eta zenbait ikerketetan hobekuntzarik ez lortu. Horrez gain, programa horien bitartez pazienteen funtzio fisikoa, mina, loaren nahasmendua, antsietatea, egoera psiko-sozialaren, etab. hobekuntza nabarmena da.

Eztabaida: Ikerketen emaitzak aztertuta, nabarmena da nekea murriztea eta bizi-kalitatea hobetzea lortu duten ikerketak gehiengoak direla. Gainera, aztertu den moduan, erizaintza zainketak barne hartzen dituen jarduera fisikoko programa zehatza dira eraginkorrenak. Gainera, egoera fisikoan eta afektibitatean duen eragina ere onuragarria da pazienteen egunerokotasunean. Minbizi motari dagokionez, ikerketa kopuruarekin bat eginez, Hodgkin linfomari buruzkoak dira hobekuntza gabeko ikerketa gehienak.

Ondorioak: Ikerketen bitartez erizaintza-zainketak barne hartzen dituen jarduera fisikoko programak nekea murrizteko eta bizi-kalitatea hobetzeko balio dutela aztertu ondoren, eta pazienteen eguneroko bizitzan eragin handia duela agerian egonda, erizaintza-zainketak barne hartzen dituen saio eta heziketa programak beharrezkoak direla aipatu beharra dago. Gainera, era multidisziplinarrean egindako ikerketa gehiago behar direla ondoriozta daiteke.

Hizkuntza: Euskera.