Bularreko minbizi metastasikoa emakumeetan: jarduera fisikoaren eragina eta hobekuntza proposamen praktikoa Donostia onkologikoko proiektuari

Abstract

Minbizia, kontrolik gabeko hazkundea ezaugarri duten 100 gaixotasun mota baino gehiagoko taldea da, era berean, eragin handiko eritasuna da. Izan ere, munduko heriotza eragile nagusietako bat bihurtu da, hala, bigarren kausa nagusia dela urtean milaka kasu berri diagnostikatuz. Ildo horri helduz, mundu mailako zenbatespenek 2040ean kasu berrien kopurua 30,2 milioikoa izango dela adierazten dute. 2021ean Espainian gehien diagnostikatutako minbizi kasuak hauek izan dira: kolonekoak eta ondestekoak (43.581), prostatakoak (35.764), bularrekoak (33.375), birikakoak (29.549) eta gernu-maskurikoak (20.613). Bularreko minbizia emakumeen artean intzidentzia eta hilkortasun tasa handiena duen minbizia da. Ondorioz, behar-beharrezkoa da gaixotasun honi aurre egiten laguntzen duten ibilbideak topatzea. Oraindik ere, asko geratzen da ikertzeko patologia honen inguruan, hau da, erronka handia dago aurretik, baina hala eta guztiz ere, ebidentziak jarduera fisikoak duen eraginkortasuna argi uzten du minbiziaren arriskuaren murriztapenean; eta honakoa pairatzen duten gaixoen sentsazioen hobekuntzan. Jarduera Fisikoa (hemendik aurrera JF) tratamendu farmakologikoaren aldean, edozein pertsonaren organismoan polipidora bat bezala jarduten du, hots; organo guztiei eragiten die modu positiboan efektua txikia bada ere, eta ez du inongo alboko ondorio kaltegarririk sortzen (bigarren mailako efektuak) modu egokian egiten bada, are gehiago, onura askoren agerpena bermatzen du. Hori dela eta, tresna eraginkorra eta erabilgarria da bularreko minbizi metastasikoa duten emakumeen bideari aurre egiten laguntzeko, zeina tratamenduak bizi kalitatea eragozten dien. Aurreko guztia esanda, Donostiako Onkologikoan gauzatutako praktikei esker, gizartean berebiziko inpaktua duen minbizia bezalako gaixotasuna gertutik bizitzeko aukera izan dut, hain zuzen ere, bularreko minbizi metastasikoa duten emakumeen errealitatea. JFari begira, proiektuaren gaineko hobekuntza proposamena egitea da nire helburua.