Lunbalgiak tratatu eta ekiditeko indar entrenamenduaren eta jarduera fisikoaren garrantzia

Abstract

Garrantzia. Lunbalgiak munduko osasun publikoko arazo handienetako bat da bere ondorio psikologiko eta sozioekonomikoengatik. Horregatik oso garrantzitsua da lunbalgia horiek modu egokian tratatu eta ekiditea. Jarduera Fisikoak (JF) eta indar entrenamenduak (IE) oso eraginkorrak izan daitezke tratamendu eta prebentzio programak aurrera eramaterakoan.

Helburua. Errebisio sistematiko honen helburua JF eta IE programa ezberdinek lunbalgia akutu edo kronikoa jasaten duten pertsonengan eraginkortasuna aztertzea da.

Metodologia. Errebisio sistematiko hau Preferred Reporting Items for Systematic Review and Meta-Analyses-en (PRISMA) gomendioak jarraituz PubMed-eko datu basean egindako bilaketa baten bidez burutu da. Aztertutako ikerketa guztien kalitatea Physiotherapy Evidence Database (PEDro) eskalaren eta Oxford’s Evidence mailaren bidez baloratu dira.

Emaitzak. Zortzi artikulu zientifiko onartu eta aztertu dira. Horietan JF eta IE programa ezberdinen bariabilitate handia aurkitu da, horietako zazpietan emaitza adierazgarriak aurkituz. Aztertutako artikulu guztien kalitatea bikaina da.

Ondorioak. Lunbalgien prebentzio eta tratamendurako JF eta IE programak onuragarriak izan daitezke bizkarreko minaren aldagai ezberdinetan, eta batez ere minaren atalase eta kargu psikologikoan. Hala ere, oso garrantzitsua da programa ezberdinak diseinatzerakoan bizkar edota lunbarreko zein giharreria indartu eta egonkortu behar dugun argi izatea.