Whatsapp elkarrizketak zigor prozesuan: frogaren balorazioan sortutako zailtasunak

Abstract

Agerikoa da, XX. mendeko erdialdean emandako iraultza teknologikoaren ondoren, gure egunerokotasunean teknologiak duen pisua. Aurrerapen teknologiko geldiezin horrek gizarte osoari eragiten badio ere, gutxi batzuk baino ez dira konturatzen teknologiak zuzenbidean duen eraginaz. Horregatik, teknologiak zigor prozeduraren froga-fasean zer eragin dituen aztertuko dugu lan honetan, frogaldiaren fase ezberdinetan froga digitalak, whatsappak zehazki, sortu ditzakeen arazoak plazaratuz. Gaur egun, gizartearen beste eremu askotan bezala, zuzenbidean ere, teknologiaren erabilera esanguratsua da zenbait ekintza aurrera eramateko. Kasu, prozesu judizialetan aldez aurretik egiten den ikerketa lanetan, edo frogak biltzearen fasean egintzak errazteko. Hala ere, teknologiaren erabilera okerra ere egin daiteke, hala nola, delituak burutzeko eta delituen egitea errazteko tresna moduan. Gailu teknologikoez baliatzea alegatutako egitateak egiazkoak direla egiaztatzeko, hots, tresna digitalak froga bezala erabiltzea, gero eta ohikoagoa da edozein prozedura judizialetan. Halaber, tentu handiz tratatu beharreko frogetaz ari gara hitz egiten, zenbaitetan berme prozesalak eta prozesuan parte hartzen duten alde ezberdinen oinarrizko eskubideak eta askatasunak murriz ditzaketelako1 . Froga digital guztien artean Whatsapp aplikazioan jarri dugu arreta, txataplikazioaren elkarrizketen edukiak (mezuak, argazkiak, bideoak, audioak, etab.) auzitegietan nola aurkeztu eta bere segurtasun-protokoloa zein den aztertu dugu hain zuzen ere