Dieta eta aldaketa nutrizionalen papera lagungarri gisa endometriosiaren tratamendu sintomatikoan: errebisio bibliografikoa, proposamen dietetikoa eta dibulgazio txostena

Abstract

[EU] Endometriosiak bizi kalitatean duen eragina eta behin betiko tratamendu eraginkor eza kontuan izanik, beharrezkoa da egoera klinikoa hobetzeko alternatibak bilatzea. Besteak beste, dieta helburu honetarako erabilgarria izan daitekeela ikusi da. Gurutzetako Unibertsitate Ospitalean endometriosidun emakume ugarik beren kabuz dietan aldaketak burutzen dituztela ikusi da, klinikaren hobekuntza lortuz, eta osasun publikoak pauta nutrizionalak eskuratu beharko lizkiekeela deritze. Lan honen helburua osasun zentroetan emateko gomendio dietetikoak biltzea da, baita astebeterako dieta eredu bat proposatzea ere, aktiboki honi buruz galdetzen dutenei eskaintzeko. Horretarako, gaur egun gai honi buruz eskuragarri dagoen ebidentzia zientifikoaren errebisio bibliografikoa burutu da, Medline Pubmed databasea erabiliz, eta 5 errebisio eta meta-analisi bat aztertu dira. Barazki, fruta, esneki, arrain urdin, te txuri eta berde eta zenbait espeziak klinikaren gain eragin onuragarria izan dezaketela ikusi da, eta haragi gorria, trans gantz-azidoak eta gantz-azido saturatuak berriz kaltegarria. Gainera, dieta antiinflamatorioa eta mediterraneoa ere aproposak izan daitezke. Nolanahi ere, eragina oso aldakorra izan daiteke pertsonaren arabera eta gaixotasunaren eboluzioan ez da eragin argirik frogatu. Gainera, dietak ez ditu ohiko azterketa eta tratamendua ordezkatzen. Azkenik, kontuan izan behar da ebidentzia zientifikoaren oinarri diren ikerketen artean heterogenizitate handia dagoela, beraz garrantzitsua da kalitatezko ikerketa gehiago burutzea arlo honi buruz.