Cinema and audiovisual media in minority languages in France. The development of Basque cinema and the genesis of a public policy in its favour in the Northern Basque Country (2015-2023)

Abstract

2010eko hamarkadatik aitzina Ipar Euskal Herrian zinema sektorea garatzen hasten da. Alde batetik, gogoetak eta ekintzak eramanak dira Hego Euskal Herrian eginak diren euskal filmak erakutsiak izateko eta bestaldetik, zinemaren arloan gaitasun gorakada bat susmatzen da: ekoiztetxeak sortzen dira, filmegile belaunaldi berri bat agertzen da, profesionalak egituratzen dira. Tesi honek Frantses Estatuak hizkuntza gutxituetan den zinema garatzeko aukerak eskaintzen dituen aztertzea proposatzen du eta euskal zinemak Ipar Euskal Herrian garatzeko topatzen dituen mugak eta aukerak identifikatzen ditu, aldeko politika publiko baten genesiaren azterketa eginez.Erakunde publiko ezberdinen kultur eta hizkuntza politiken analisiaren bitartez, profesionalekin eginiko elkarrizketen bitartez eta ekintza-ikerketan oinarritutako euskal filmen banaketa esperientzia baten bitartez, ondorio hauetara iritsi gara: Frantziak euskara, frantsesa eta Frantziako beste hizkuntzak bezala kontsideratua badu zinema arloko deialdi eta araudietan, ez du aldeko politika integratzailerik eramaten. Hala ere, lurraldeetako politika publikoek eragina izan dezakete hizkuntza gutxituetan diren ikus-entzunezkoetan, eta Kultur eta Sormen Industriak garapen ekonomikorako eremu estrategikotzat identifikatu dituztelarik auzoko lurraldeek, momentu egokia izan daiteke arloan eragiteko Ipar Euskal Herriaren kasuan ere. Azkenik, ekosistema berri baten eraikuntzan, mugaz haraindikoa eta euskara, sektorearen garapenerako aukera bezala identifikatzen dira.