dc.description.abstract | Gradu amaierako lan honetan Arabako eta Trebiñuko Burdin Aroko herrixka
harresituak aztertu dira. Helburu nagusia orain arte hainbat ikertzailek (Llanos, Galilea,
etab.), proposatutako hipotesietan sakontzea izan da, euren banaketa lurraldearen
ezaugarri biogeografikoekin (baliabide potentziala kontutan hartuz ekonomiara
gerturatzeko, etab.) eta komunikabide nagusiekin uztartuz, azken batean, kokapenak,
ekonomiaren ezaugarriak, elkar trukeak, etab. ulertzeko.
Aztarnategien hautaketan funtsezkoa jo dugu jarduera arkeologikoak burutuak eta
argitaratuak izatea, izan ere, herrixken kopurua handia izan arren, gutxik dutelako lan
arkeologiko oso bat egina. Lan honetarako, Arabako Karta Arkeologikoa oinarri bezala
erabili dugu, bertan agertzen direnen informazioa jasoz (koordenatuak, tokiaren ezaugarri
fisikoak, aztarnategien ezaugarri orokorrak, aztarna materialak, kronologia, etab.) datu
base bat eratzeko. Hala eta guztiz ere, Karta Arkeologikoa 1987koa denez, informazioa
eguneratu eta zuzendu egin dugu: aztarnategi berriak sartu, kokapenak kontrastatu,
koordenatuak egokitu, etab. Azkenik, aitortu behar da muga batzuk izan ditugula lana
burutzekoan. Batzuetan, argitalpenetan ez dute sakontzen aurkitutako aztarnetan eta
gehienetan ez dago informaziorik arlo batzuen inguruan: kronologia erradiokarbonikoa,
paleoingurunea, arkeolozoologia ,etab.
Aztarnategien azterketa zehatzago baterako QGIS Lyon programa erabili dugu,
hainbat atal (kokapena, ikus-eremua, euren arteko distantziak edo influentzia eremua,
erlazioa komunikabide naturalekin, etab.) analizatuz, taula eta mapa ezberdinetan
azalduz.
Behin hamabost aztarnategiak aztertu ondoren, hauen informazioarekin eta QGISarekin
lortutako datuekin Burdin Aroko habitat hauen inguruan konklusio batzuk atera
ahal izan ditugu: non dauden herri gehienak edo bideen garrantzia hauen kokapenean
besteak beste. | |