Proteina konbertasen adierazpena minbizi-zelula parental eta minbizi-zelula ametan (CSC)

Abstract

[EUS] Minbizia hilkortasun oso handiko gaitza da, 2015. urtean 8,8 milioi hildako eragin zituen. Nahiz eta tratamendu bortitz eta luzeak aplikatu, askotan denbora baten ostean gaixotasunaren errekurrentzia gertatzen da, baita metastasiak ere. Eta hemen dago arazoa, izan ere, kasu horietan gaiztotasun maila handiko minbizi-zelula erresistenteak agertzen dira. Uste da guzti horren atzean minbizi-zelula amak (Cancer Stem Cells, CSC) daudela, zelula amen antzeko ezaugarriak dituzten minbizi-zelulak. Izan ere, orain arte erabilitako tratamenduek tumoreetako zelula guztiak hiltzen dituzte CSCak izan ezik, eta honek gaixotasunaren errekurrentzia eragiten du. Honen aurrean, CSCen mekanismoak ulertu eta hauen aurkako tratamendu espezifiko eta eraginkorra aurkitzea beharrezkoa bihurtu da minbiziari aurre egiteko. Hori lortzeko itua proproteina konbertasak izan daitezkeela proposatu da. Hauek minbiziaren garapenerako ezinbestekoak diren hainbat proteinen aktibazioan parte hartzen dute (hazkuntza faktoreak, esaterako). Eta ikusi da hainbat minbiziren kasuan konbertasen adierazpena normalean baino altuagoa dela. Honen aurrean, konbertasa-adierazpena aztertu eta konparatu da, koloneko minbizidun zelula-lerro metastatiko eta ez-metastatikoetako CSC eta zelula parentaletan. Ikusi da konbertasen adierazpena handiagoa dela CSCetan minbizi-zelula parentaletan baino, eta baita zelula-lerro metastatikoan zelula-lerro ez-metastatikoan baino. Honen aurrean, beharrezkoa da ikerketarekin jarraitzea, bai mRNA mailan baita proteina mailan ere, konbertasek minbizian duten inplikazio eta eragina aztertu eta frogatzeko.