Ariketa fisiko aerobiko programa ezberdinen aurretik eta ondorengo bizi-kalitatearen balorazioa gainpisua/obesitatea eta lehenengo mailako hipertentsioa duten pertsonengan

Abstract

SARRERA: Gaur egungo gizartea gero eta sedentarioagoa da, sedentarismoa hipertentsio arteriala eta obesitatearen arrisku faktore garrantzitsu bat izanik. Sedentarismoa beraz bizi kalitate txarrarekin zuzenki lotuta dago gaixotasun kardiobaskularren arrisku nagusia delako. Arrisku hauek jarduera fisikoaren bidez murriztu daitezke.

HELBURUAK: Lan honen helburu nagusia jarduera fisiko aerobikoak obesitatea/gainpisua eta hipertentsioa duten pertsonen bizi kalitatean sortzen dituen efektuak ezagutzea da. Bigarren mailako helburu bezala, talde ezberdinetan eman diren hobekuntzak zeintzuk izan diren ezagutzea eta talde hauen arteko konparaketa egitea izango litzake.

METODOAK: EXERDIET- HTA ikerkuntzatik 228 pertsonek parte hartu zuten. Gaitasun fisikoaren neurketak esfortzu probaren bitarteko bizikleta ergometriko baten bidez egin zitzaien eta bizi kalitatea SF-36 galdetegiaren bidez neurtua izan zen. Hamasei asteko jarduera fisiko interbentzioa egin zitzaien parte hartzaileei, bi talde ezberdinetan banatuta: kontrol taldea (KT, jarduera fisiko gomendioekin) eta ariketa taldea (AT, astean bitan ariketa fisiko gainbegiratua). Parte hartzaile guztiek dieta gomendioak izan zituzten. Interbentzio hasieran eta ondoen proba guztiak errepikatu ziren.

EMAITZAK: Interbentzio ondorengo baloreak aztertuta, talde guztiek hobekuntza esanguratsuak (P<0,05) erakutsi zituzten gorputzeko masa, gerri zirkunferentzia eta tentsio arteriala jaitsiz, eta gaitasun kardiorrespiratorioan igoz. Aldagai honetan, AT-k igoera altuagoak (P<0,001) KT-rekin konparatuz erakutsi zuen. Bizi kalitateari dagozkion emaitzak aztertuz, AT-an funtzio fisikoa (P=0,012) eta osasun orokorraren (P<0,001) aldagaietan hobekuntza agertu ziren balore altuagoekin. Bizitasuna aldagaia izan zen talde guztiek esanguratsuki (P<0,05) hobetu zuten aldagaia.

KONKLUSIOAK: Obesitatea eta HTA duten pertsonetan, gorputzeko konposizioa, gaitasun kardiorrespiratorioa eta funtzio fisikoaren pertzepzioa hobetu da ariketa fisiko programa baten ondoren eta ondorioz bizi kalitatearen hobekuntza eman da.