Entrenamendu kargaren kuantifikazioa eta analisia: barne eta kanpo kargaren arteko harremana hesi lasterkari baten entrenamenduan

Abstract

Lan honen helburua entrenamendu kargaren aldagai ezberdinen arteko lotura aztertzea da hesi lasterkari batean; hau da, kanpo kargako aldagaien eta barne kargaren artean zein lotura dagoen analizatzea. Era berean, kanpo karga kuantifikatzeko alternatiba ekonomiko eta nahiko erraz baten proposamena burutu nahi da, kanpo kargaren aldagai jakin batzuetan arreta ipiniz. Honetarako, entrenamendu kargaren aldagai ezberdinen kuantifikazio prozesu bat burutu da hesi lasterketako modalitatearen alorrean. Parte hartzailea 26 urteko mutil bat izan da, 110 m eta 60 m hesien modalitatean espezializatua (atletismoan). Atletaren eskakizun fisiko eta erantzun fisiologikoen entrenamendu karga kuantifikatu da denboraldi osoan zehar; iraileko entrenamendu fase orokorretik martxoko Espainiako txapelketetara arte, txapelketa fasearekin amaituz. Honetarako, hainbat tresna eta aldagai kontsideratu dira; hala nola, pertzibituriko esfortzuaren ratioa (RPE) Borg CR-10 eskalaren bitartez barne karga neurtzeko alde batetik; eta distantzia totala, intentsitate ezberdinetako lana (gaitasun eta potentzia aerobikoa, gaitasun eta potentzia laktikoa, gaitasun anaerobiko alaktikoa eta potentzia alaktikoa), errepikapenak, indar maximoko lana, esplosibo erreaktiboko eta erreaktibo erreflexuko lana kanpo kargaren aldagai gisan, bestetik. Hau, behaketa zuzenaren bitartez eta neurketak burutuz (metro zein kg-tan) egin da. Gainera, erresistentziak edota hesien altuera zein kopuruak ere kontuan hartu dira. Emaitzetan kanpo karga eta barne kargaren artean harreman estua dagoela ikusi da; barne karga kanpo kargaren ondoriozko erantzun garbi bat dela azpimarratuz eta euren artean kausa ondorio erlazioa finkatuz. Bestalde, barne karga bereziki entrenamendu eta lehiaketen intentsitate mailarekin gehiago lotzen dela aztertu da eta entrenamendu bolumen handiak gailentzeak barne kargan eragina duela ikusi da baita ere. Era berean, entrenamendu bolumen handiek lesio arriskua areagotzen dutela antzeman da, modu nabarmen batean. Ondorio gisan, atleten entrenamendu prozesuaren monitorizazioak duen garrantzia azpimarratu eta atletismoaren eremuan ikerketa gehiago behar direla esan daiteke.