K antibitamina antikoagulatzaileen tratamenduaren autokontrolari buruzko formakuntza osasun profesionalei bideratuta, AGIAC elkartearekin elkarlanean

Abstract

Sarrera: Egun Gipuzkoan 10.000 pertsona inguruk hartzen du aho bidezko antikoagulatzailearen tratamendua. Gehienek osasun zentroan egiten dute kontrola modu periodikoan, beste gaixo kroniko batzuk bezala, hipertentsioa edo diabete mellitusa esaterako. Aho bidezko antikoagulatzailearen tratamenduak ohizko kontrola behar du, kasu batzuetan oso erraza delako farmakoaren maila odolean aldatzea. Autokontrola pazienteak berak etxean egiten duen kontrola da, osasun zentrora joan gabe, ohiko kontrolean bezala. Monitorizazio modu honek onura asko ditu (betiko kontrolak baino gehiago) eta horretaz gain lehen mailako arretan denbora aurreztuko luke. Autokontrola promozionatzen duen elkarte bat dago Donostian: Asociación Vasca de personas Anticoaguladas, AGIAC. Bertan pazienteari autokontrolari buruz formatzen zaio eta pazienteak tratamendua egoki hartzen ari dela ziurtatzen da, baita autokontrola ondo egiten duela ere. Helburua: AGIAC elkartearekin elkarlanean, proiektu berritzaile eta praktiko batean parte hartzea. Jarduerak eta emaitzak: AGIAC elkartearen lana ezagutu da eta beraiekin adostutako proiektua martxan jarri da. Hasteko, informazio bilketa egin da, asoziazioarekin elkarbanatu eta hainbat bilera egin eta gero bukaerako bideoaren nondik norakoa adostu da. Behin aurkezpen grafikoa osatu denean gidoia egin da ezinbestekoa den informazioa azpimarratzeko. Audioaren grabaketa egin eta bideoarekin bat moldatu da. Bukatzeko, proiektua entregatu da eta feedback-a modu sortzailean jaso da. Gogoeta: Niretzako ezezaguna zen antikoagulazioan murgiltzeko aukera ezinhobea izan da Gradu Amaierako Lan berritzaile hau. Erizainaren lana osasunaren promozioa denez, garrantzitsua da pazientea autokontrolean hezitzea bizitza kalitatea hobetze aldera. Gaixotasun kardiobaskularrak mundu mailan lehen heriotza arrazoia izanda, oso garrantzitsua da aho bidezko antikoagulatzaileen autokontrola ondo jarraitzea. Lehen mailako arretan osasun zentroetako kontrolak hobetzeko hainbat gauza izan ditzake, beharbada autokontrola izan daiteke gaixotasun kardiobaskularren mortalitatea murrizteko gakoa. Horregatik autokontrola jakitera ematea ezinbestekoa iruditzen zait osasun profesionalen artean, erizainei bereziki, osasuna sustatzen lehenak izateagatik. Gako-hitzak: autokontrola, aho bidezko antikoagulatzaileak, gaixotasun kardiobaskularrak, K bitaminaren antagonistak.