Giovanna Garzoniren “Piante Varie”: ilustrazioa eta zientziaren artea(n)

Abstract

XVII. mendeko Giovanna Garzoni artista italiarraren Piante Varie kuaderno botanikoaren azterketarekin batera ilustrazioaren nondik norakoak aztertzen dituen Gradu Amaierako Lana da “Giovanna Garzoniren Piante Varie: illustrazioa eta zientziaren artea(n)”. Bertan, ilustratzaile profesional zein ikerlari adituen iritziak kontuan izanik, ilustrazioaren inguruko eztabaidari erreparatu eta honi arte kategoria aitortzearen aldeko argudioak mahaigaineratzen dira. Batzuek komunikaziorako tresna bisual gisa kontsideratzearen alde egiten duten arren, zenbait adituk artea dela defendatzen dute, zentzu praktikotik haratago posizionatuz eta ilustratzailearen sormena, estiloa eta gaitasun artistikoa defendatuz. Beraz, ilustrazio botanikoaren kasuan, zientifioki objektiboa izan behar duenez ilustrazioaren subjektibitatea aldarrikatu eta artistaren estiloa marrazkian inprimatzen dela argudiatzen dute. Ondoren, kuaderno botanikoaren azterketa lanaren helburu nagusia izanik horretara hurbiltzeko asmoaz, ilustrazio botanikoan sakonduko dut, metodologia feministatik hastapenak eta testuingurua aztertuz. Iraultza zientifikoan jazotako aldaketak aztertu eta batez ere emakumeei nolako rola asumitzea exijitu edo ukatu zitzaien azalduko da. Testuinguru horretan, ilustrazio botanikoa disziplina feminizatua izatearen arrazoiak eta eragileak mahaigaineratuko dira, generoen hierarkizazioak eta ilustrazio botanikoaren inguruko ikuspegiak emakumeentzat eginiko disziplina bezala definitu baitzuen. Emakumeek zientzian eta ilustrazio botanikoan izandako papera aztertzearekin batera eta kuaderno botanikoaren azterketa artistikoa bere testuinguruan kokatu asmoz, Giovanna Garzoniren biografiaren nondik norakoak aztertuko ditut, artistaren produkzioa eta ibilbidearen berri emanaz. Jarraian, kuaderno botanikoaren azterketa artistikoa burutuko dut. Horretarako, azterketa artistikoa are aberatsagoa izan dadin, botanikan eta zientzian adituak diren zenbait pertsonen iritziak hartu ditut kontutan. Lanaren murrizketak direla medio, kuaderno botanikoa 50 ilustraziok osatzen badute ere adierazgarrienak baino ez dira zehatz aztertuko, azterketa artistikorako eraginkorrenak edo interesgarrienak zirelako. Modu horretan, ilustrazio botanikoa eta ilustrazioa bera artea bezala irakurri aztertu daitekela erakutsi nahi dut. Zenbait ondorio eta hausnarketek emango diote amaiera lan honi. Ilustratzaile profesionalen iritziak kontuan izanik ordura arte garatutako puntu guztiak berrikusi eta sintesian azalduko dira, ildo narratiboaren puntu komunarekin amaituz.