Erretinaren terapia anti-inflamatorietarako nanopartikula lipidikoak garatzea eta ebaluatzea.

Abstract

Erretinako endekapen-gaixotasunak morbilitate-kausa garrantzitsu bat bihurtu dira gaur egungo gizartean, ikusmen-urritasuna eragiten baitute. Inflamazioak rol garrantzitsua du gaixotasun hauen progresioan. Horregatik, lan honetan, erretinako zeluletan (RPE) inflamazioa inhibitzea proposatzen da, zelulen heriotza gutxitzeko. Arazoa da, begiek hainbat hesi fisiko eta fisiologiko dituztenez, ez dela batere erraza farmakoak begian mantentzea eta hesi biologiko horiek zeharkatzea, eraginkorrak izan daitezen. Azken urteetan, NLC-ek (Nanostructured Lipid Carriers) ospea hartu dute farmakoak banatzeko plataforma gisa. Hori dela-eta, MCC950 konposatua NLRP3 inflamasomaren inhibitzailea dena NLC nanopartikuletan kapsulatu da eta haren eragina aztertu da, TNF-α molekularen ondorio kaltegarriak ekiditeko neurri gisa. Emaitzek agerian utzi dute MCC950-dun NLC-ak, kontzentrazio baxuetan, eraginkorrak direla inflamazioa ekiditeko eta zelulen bideragarritasuna hobetzeko. Gainera, MCC950 puruarekin konparatuta dituzten abantailak kontuan hartuta, argi ikusten da jarraitu beharko litzatekeela NLC-en ikerketarekin eta erretinako endekapen-gaixotasunak tratatzeko terapia antiinflamatorioekin.