Azpihipoteka: garapen historikoa, araudia eta izaera juridikoari hurbilketa

Abstract

[EU] Azpihipotekaren azterketan oinarritzen da lana, Erromatar Zuzenbidean errotutako eta Europako ordenamendu juridiko zibil guztietatik Espainian soilik onartutako figura juridikoarena. Analisi sakon baten bidez, haren garapen historikoari eta egungo araudiari heltzen zaie, eta hurbilketa bat egiten da haren izaera juridikora, kreditu-lagapenaren eta kreditu-bahiaren figurekin kontrastatuz. Azpihipoteka Erromatar Zuzenbideko subpignus-etik datorrela ondorioztatzen da, sistema erromatarreankreditua eta hau bermatzen duen garantia banagarriak direla ulertzen baita. Hala ere, herrialde gehienek kode zibil modernoagoetan ez dute figura hori onartu, hain zuzen ere, kreditua eta bermea banaezinak direla estimatzen dutelako. Hori horrela, Espainia salbuespen bat da, figura juridiko honi “jarraipena” ematerakoan. Dena dela, gure ordenamenduan azpihipotekaren inguruan aurki dezakegun arauketa urria da: 1861eko lehen Hipoteka Legetik “arrastaka” heldu da eta egungo legerian ia aipatu ere egiten ez da. Arauketa eta doktrina-lan falta horrek zaildu egiten du kontzeptuaren eta izaera juridikoaren azterketa. Figuraren izaera juridikoari dagokionez, hainbat jarrera desberdin planteatzen dira autoreen artean. Batzuk bermea eta kreditua banandu ezin direla uste dute; beste batzuk, berriz, azpihipoteka hipotekaren eskemari subjektu gehigarri bat gehitzen dion figura autonomoa dela defendatzen dute. Eztabaida hau dela eta, hipoteka kreditu-lagapenaren eta hipoteka kreditu-bahiaren figurekin kontrastatzen da azpihipotekarena, ea berezko figura den edo bi hauetariko baten oso antzekoa den ikusteko. Ariketa honen ostean ateratako ondorioa argia da: azpihipoteka berezko izaera duen figura juridiko autonomoa da.