Hego Euskal Herriko gazteen arteko harreman eredu berriak. Neoliberalismoaren alternatiba edo ondorio?

Abstract

Lan honen oinarri teorikoa bi ataletan banatu da. Lehen atalean harremanen, lagun zein afektibo-sexualen, izaera politikoa zein den aztertu da, zehazki, zein eragin duen sistema neoliberalak harremanetan eta zergatik eta nola moldatzen diren harremanak sistema horretara. Horretarako errebisio historiko bat egin da gizarte ereduen eta harremantzeko moduen arteko lotura bilatu duena. Ikusiko dugunez, harremanak aztertzerako orduan beraz, testuinguru ekonomikoa kontuan hartu beharra dago, izan ere, gizartearen egitura ekonomikoak baldintzatzen du gainegituraren izaera politiko eta ideologikoa. Zehazki, produkzio eredu ezberdinak identifikatzen saiatuko gara, eta, horiekin batera, edo ondorioz, garatu diren harremanak aztertzen. Hurrengo atalean egungo gazteen harreman ereduen nolakotasuna aztertu da. Sistema gisa identifikatzen den kultura monogamoaren eraginak eta honen aurrean neoliberalismoan ematen diren harreman eredu ez-hegemonikoak ikertu dira. Horrez gain, generoaren inguruko analisia eta harreman ereduen kontraesanak ere landu dira. Behin oinarri teorikoa osatuta analisi enpirikoari ekin diogu inkesta eta talde eztabaida bidez lortutako informazioa oinarri izanik. Hego Euskal Herriko gazteen harreman ereduen azterketa burutu da, eta hasteko, 80. hamarkadatik gaur egunera arte emandako aldaketak ikertu. Horren harira, monogamiatik polimaitasunera izandako aldaketak oinarri hartu dira eta ibilbide horretako harreman “askeen” pertzepzioa landu da gaur egun zaintzak harremanetan jokatzen duen paperarekin batera. Harremanetan kapitalismo neoliberalaren eraginei dagokienez, gazteek duten kontzientzia maila ikertzea izan da hurrengo pausua, eta honi jarraiki, generoaren araberako bizipenen analisia ere egin da. Atal honen azken puntuan harremanak hobetze aldera gazteen proposamenak eta ideiak bildu dira. Amaitzeko, ikerketaren ondorioak atera ditugu eta erabilitako oinarri bibliografikoa aipatu dugu. Eranskin gisa, inkestaren diseinua eta eztabaida taldeen elkarrizketa gidoia aurkeztu ditugu.