Irakasleen arteko harremanak eskola txiki batean: adimen emozionala oinarri duen praktika baten analisia

Abstract

Honako hau, Nafarroako iparraldeko landa-eremuan kokatua dagoen eskola publiko bateko irakasleen arteko harremanak aztertzen dituen Gradu Amaierako Lana da. Eskola txikia izateak eta bereizgarri egiten duen Emozio Hezkuntza-ren proiektua aurrera eramateak harreman horiengan duten eragina izan dira aztergai nagusi. Horretarako, bi irakasle-tutore eta zuzendariari sakoneko elkarrizketak egiteaz gain, irudien analisia eta narratibaren teknika kualitatiboa erabili dira, hauen bizipenen sakontasuna bilatzeko helburuarekin. Bildutako ebidentzien bidez, eskola txikian aritzeak eta emozionalki adimentsuak izateak irakasleen arteko harremanak baldintzatzen dituela frogatu ahal izan dugu. Bukatzeko, lan honek hobekuntza proposamen batzuk formulatzeaz gain, etorkizunari begira ikerketa lerro berri bat irekita utzi du, hezkuntza emozionala azpimarratuz.